ଗରିବ ମା ଘର ଘର ବୁଲି ବିକ୍ରି କରୁଥିଲେ ଚୁଡ଼ି, ଆଉ କଠିନ ପରିଶ୍ରମ ବଳରେ ଝିଅ ହେଲେ ଡେପୁଟି କଲେକ୍ଟର,ଜାଣନ୍ତୁ ସଫଳତାର ରହସ୍ୟ

କୁହାଯାଏ ଯେ ସଫଳତା ସେହି ଲୋକମାନଙ୍କୁ ମିଳିଥାଏ, ଯେଉଁମାନେ ଲଗାତାର କଠିନ ରାସ୍ତାରେ ଆଗକୁ ବଢି଼ଥାନ୍ତି | ଲକ୍ଷ୍ୟସ୍ଥଳରେ ପହଞ୍ଚିବାକୁ ମଣିଷକୁ ବହୁତ କିଛି ସହିବାକୁ ପଡିଥାଏ | ବହୁତ କଠିନ ରାସ୍ତା ଦେଇ ଗତି କରିବାକୁ ପଡେ | ଅନେକଥର ପରିସ୍ଥିତି ଏପରି ହୋଇଯାଏ ଯେ ମଣିଷ ନିଜ ସାହସ ହରାଇବାକୁ ଲାଗେ, କିନ୍ତୁ ଏହି କଷ୍ଟକର ପରିସ୍ଥିତିରେ ଯିଏ ଆଗକୁ ବଢିଥାଏ, ସେ ହିଁ ନିଜ ଲକ୍ଷ୍ୟସ୍ଥଳରେ ପହଂଚିବାରେ ସଫଳତା ହାସଲ କରିଥାଏ |

ଆଜି ଆମେ ଆପଣଙ୍କୁ ମହାରାଷ୍ଟ୍ରର ନାନ୍ଦେଡ ଜିଲ୍ଲାର ବାସିନ୍ଦା ବସିମା ଶେଖଙ୍କ ସଫଳତାର କାହାଣୀ କହିବାକୁ ଯାଉଛୁ, ଯିଏ ନିଜ ଜୀବନର ସମସ୍ତ ଅସୁବିଧାକୁ ସାମ୍ନା କରି ନିଜ ପରିଶ୍ରମ ଆଧାରରେ ମହାରାଷ୍ଟ୍ର ଜନସେବା ଆୟୋଗରେ ତୃତୀୟ ସ୍ଥାନ ପାଇଥିଲେ ଏବଂ କଲେକ୍ଟର ହୋଇ ପୁରା ପରିବାରର ନାମକୁ ଉଜ୍ଜ୍ୱଳ କଲେ |

ମାଆ ଘର ଘର ବୁଲି ଚୁଡ଼ି ବିକ୍ରି କରୁଥିଲେ :-

ବସିମା ଶେଖଙ୍କ ପାଇଁ ଡେପୁଟି କଲେକ୍ଟର ହେବାର ଯାତ୍ରା ଆଦୌ ସହଜ ନଥିଲା | ସେ ତାଙ୍କ ଜୀବନରେ ଅନେକ ଅସୁବିଧାର ସମ୍ମୁଖୀନ ହୋଇଥିଲେ | ପ୍ରତ୍ୟେକ କଠିନ ପରିସ୍ଥିତିର ମୁକାବିଲା କରି ସେ ଏଇଠି ପହଞ୍ଚିବାରେ ସକ୍ଷମ ହୋଇଛନ୍ତି | ମିଡ଼ିଆ ରିପୋର୍ଟ ଅନୁଯାୟୀ, ତାଙ୍କ ବାପା ମାନସିକ ସ୍ତରରେ ଅସୁସ୍ଥ ଅଟନ୍ତି ଏବଂ ତାଙ୍କ ମା ଘର ଘର ବୁଲି ଚୁଡ଼ି ବିକ୍ରି କରନ୍ତି ଏବଂ ଏଥିରୁ ଅନୁମାନ କରାଯାଇପାରେ ଯେ ସେ ତାଙ୍କ ଜୀବନରେ କେତେ ସମସ୍ୟାର ସମ୍ମୁଖୀନ ହୋଇଥିଲେ | କିନ୍ତୁ ବସିମା ଶେଖ ନିଜକୁ କେବେ ବି ଭାଙ୍ଗିବାକୁ ଦେଇନଥିଲେ ଏବଂ ତାଙ୍କର ନିଷ୍ଠା ଏବଂ ପରିଶ୍ରମ ସହିତ ସେ ନିଜ ଇଚ୍ଛା ମୁତାବକ ସଫଳତା ହାସଲ କଲେ |

ସାନଭାଇ ଉଠାଇଲେ ପାଠପଢା ଖର୍ଚ୍ଚ :-

ଯେଉଁଠାରେ ବସିମା ଶେଖଙ୍କ ମା ପରିବାରର ଖର୍ଚ୍ଚ ଚଳାଇବା ପାଇଁ ଘର ଘର ବୁଲି ଚୁଡ଼ି ବିକ୍ରି କରୁଥିଲେ, ସେତେବେଳେ ତାଙ୍କର ଜଣେ ଭାଇ ରିକ୍ସା ଚଳାଉଥିଲେ | ଉଲ୍ଲେଖଥାଉ ଯେ ବସିମାଙ୍କ ଭାଇ ଗ୍ରାଜୁଏସନ ଶେଷ କରି ଏକ ଛୋଟ କମ୍ପାନୀରେ କାମ କରିବା ଆରମ୍ଭ କରିଥିଲେ ଏବଂ ସେ ଏଠାରୁ ପାଇଥିବା ଟଙ୍କା ସହିତ ଘରର ଖର୍ଚ୍ଚରେ ସାହାଯ୍ୟ କରିବା ସହିତ ଭଉଣୀର ପାଠପଢା ଦାୟିତ୍ୱ ମଧ୍ୟ ନେଇଥିଲେ |

ବସିମା ନିଜର ପ୍ରାରମ୍ଭିକ ଶିକ୍ଷା ଗାଁର ନଗର ପରିଷଦ ସ୍କୁଲରୁ ପୁରା କଲେ ଏବଂ ଉଚ୍ଚଶିକ୍ଷା ପାଇବା ପାଇଁ ବ୍ଲକର ଏକ ଉଚ୍ଚ ବିଦ୍ୟାଳୟରେ ନାମ ଲେଖାଇଥିଲେ | ଏହିପରି ଭାବରେ ସରକାରୀ ବିଦ୍ୟାଳୟରୁ ସେ ଅଧ୍ୟୟନ ସମାପ୍ତ କରିଥିଲେ ଏବଂ ସର୍ବଦା ସେ ଶ୍ରେଣୀର ଜଣେ ଭଲ ଛାତ୍ରୀ ରହିଥିଲେ |

୧୮ ବର୍ଷ ବୟସରେ ହୋଇଯାଇଥିଲା ବିବାହ :-

ଯଦିଓ ବସିମାଙ୍କ ସ୍ୱପ୍ନ ବହୁତ ବଡ ଥିଲା, କିନ୍ତୁ କେଉଁଠି ନା କେଉଁଠି ସମାଜର ନିୟମ କାରଣରୁ ତାଙ୍କୁ କିଛି ଅସୁବିଧାର ସମ୍ମୁଖୀନ ହେବାକୁ ପଡିଥିଲା | ଆପଣଙ୍କୁ କହିରଖୁଛୁ ଯେ ବସିମାଙ୍କୁ ସମାଜ କାରଣରୁ 18 ବର୍ଷ ବୟସରେ ବିବାହ କରିବାକୁ ପଡିଥିଲା, କିନ୍ତୁ ତାଙ୍କ ଭାଗ୍ୟ ପ୍ରକୃତରେ ଆଉ କିଛି ଚାହୁଁଥିଲା | କାରଣ ବସିମା ଯାହାକୁ ବିବାହ କରିଥିଲେ ତାଙ୍କ ନାମ ଶେଖ ହେଇଦର ଥିଲା ଏବଂ ସେ ମହାରାଷ୍ଟ୍ର ଜନସେବା ଆୟୋଗ ପାଇଁ ମଧ୍ୟ ପ୍ରସ୍ତୁତ ହେଉଥିଲେ ଏବଂ ଏପରି ପରିସ୍ଥିତିରେ ବସିମା ତାଙ୍କଠାରୁ ବହୁତ ସାହାଯ୍ୟ ପାଇଥିଲେ |

ଏହିପରି ମିଳିଲା ପ୍ରେରଣା :-

ବସିମା ଏକ ବାର୍ତ୍ତାଳାପ ସମୟରେ କହିଥିଲେ ଯେ ସେ ଅନ୍ୟମାନଙ୍କ ପ୍ରେରଣାଦାୟକ କାହାଣୀ ପଢୁଥିଲେ, ତେଣୁ ସେ ମଧ୍ୟ ଆତ୍ମବିଶ୍ୱାସ ଲାଭ କରି ମହାରାଷ୍ଟ୍ର ଜନସେବା ଆୟୋଗ ପରୀକ୍ଷା ଦେବାକୁ ନିଷ୍ପତ୍ତି ନେଇଥିଲେ | ଆପଣଙ୍କୁ କହିରଖୁଛୁ ଯେ 2018 ମସିହାରେ ବସିମା ମହାରାଷ୍ଟ୍ର ଜନସେବା ଆୟୋଗର ପରୀକ୍ଷା ଦେଇଥିଲେ | ସେତେବେଳେ ସେ ସେଲସ ଇନ୍ସପେକ୍ଟର ଭାବରେ କାମ କରୁଥିଲେ |

ସେ ତାଙ୍କର ଉଦ୍ୟମ ଜାରି ରଖିଥିଲେ ଏବଂ ପୁନର୍ବାର ସେହି ପରୀକ୍ଷା ଦେଇଥିଲେ | ତା’ପରେ 2020 ମସିହାରେ ସେ କେବଳ ମହାରାଷ୍ଟ୍ର ଜନସେବା ଆୟୋଗ ପରୀକ୍ଷାରେ ଉତ୍ତୀର୍ଣ୍ଣ ହୋଇନଥିଲେ ବରଂ ସେ ସାରା ମହାରାଷ୍ଟ୍ରରେ ମହିଳା ବର୍ଗରେ ତୃତୀୟ ସ୍ଥାନ ଅଧିକାର କରି ଡେପୁଟି କଲେକ୍ଟର ପଦ ପାଇଲେ |