ବର୍ଷା ତୁମକୁ ମାନିବାକୁ ପଡ଼ିବ, ଘର ଛାଡ଼ିଲ କିନ୍ତୁ ଚାବି ରଖିଲ, ଆସନ୍ତା ଦୁଇ ତାରିଖ ସୁଦ୍ଧା ଅନୁଭବଙ୍କୁ ଚାବି ଦିଅ
Get real time updates directly on you device, subscribe now.
ବର୍ଷା ତୁମକୁ ମାନିବାକୁ ପଡ଼ିବ, ଘର ଛାଡ଼ିଲ କିନ୍ତୁ ଚାବି ରଖିଲ । କିନ୍ତୁ ଏବେ ତୁମ ଖେଳ ଶେଷ ହେବାକୁ ଯାଉଛି । କାରଣ ଆସନ୍ତା ଦୁଇ ତାରିଖ ସୁଦ୍ଧା ତୁମ ଶାଶୂଘର ଚାବି ଅନୁଭବଙ୍କୁ ହସ୍ତାନ୍ତର କରିବ । ଆଜ୍ଞା ହଁ, ଷ୍ଟାର ଦମ୍ପତି ବର୍ଷା ଅନୁଭବଙ୍କ ପାରିବାରିକ ବିବାଦରେ ଏବେ ନୂଆଁ ମୋଡ ଆସିଛି । ବର୍ଷାଙ୍କୁ ଅଦାଲତି ଝଟକା ଲାଗିଛି ଏବଂ ଅନୁଭବ ନିଜ ପୈତୃକ ଘରକୁ ଫେରିବାର ବାଟ ଫିଟିଛି । କୁହାଯାଉଥିଲା ବର୍ଷା ତ ଶାଶୂଘର ଛାଡ଼ିଲେ, କିନ୍ତୁ ଅନୁଭବ କାହିଁକି ଘରକୁ ଫେରୁ ନାହାଁନ୍ତି । କେବେ ଫେରିବେ ଆଉ କେମିତି ଫେରିବେ ।
ଆଜ୍ଞା ହଁ, ଏଠାରେ କହିରଖୁଛୁ ଯେ ଅଦାଲତଙ୍କ ନିର୍ଦ୍ଦେଶକ୍ରମେ ବର୍ଷା ସିନା ଘର ଛାଡ଼ିଦେଲେ, କିନ୍ତୁ ଘରର ତାଲା ପକାଇ ଚାବି ନେଇଯାଇଥିଲେ । ଆଉ ଅନୁଭବଙ୍କ ସମର୍ଥକଙ୍କ କହିବା କଥା ଯେ ଯଦି ଅନୁଭବ ତାଲା ଭାଙ୍ଗି ଘରକୁ ପଶିଥାଆନ୍ତେ, ତେବେ ବର୍ଷା ଆଉ ଏକ ମାମଲାରେ ଅନୁଭବଙ୍କୁ ଛନ୍ଦି ଦେଇଥାନ୍ତେ । ତେଣୁ ଅନୁଭବ ସେମିତି କିଛି ଭୁଲ କାମ ନକରି ଏହା ଅଦାଲତକୁ ଜଣାଇଥିଲେ ଏବଂ ଅଦାଲତ ଆଜି ନିଷ୍ପତ୍ତି ନେଇଛନ୍ତି ।
ଆସନ୍ତା 2 ତାରିଖ ସୁଦ୍ଧା ଅନୁଭବଙ୍କୁ ଚାବି ଫେରାଇବା ପାଇଁ ଏସଡିଜିଏମ ଅଦାଲତ ବର୍ଷାଙ୍କୁ ନିର୍ଦ୍ଦେଶ ଦେଇଛନ୍ତି । ତେବେ ଯଦି ଅନୁଭବ ଘର ଚାବି ଗ୍ରହଣ ନକରନ୍ତି, ତାହେଲେ କୋର୍ଟରେ ସେ ଚାବି ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି ଏବଂ ତାପରେ ଅନୁଭବ କୋର୍ଟରୁ ଚାବି ନେବେ । ଅପରପକ୍ଷେ ବର୍ଷାଙ୍କ ପକ୍ଷରୁ ଦାୟର ହୋଇଥିବା ଦୁଇଟି ପିଟିସନକୁ ମଧ୍ୟ କୋର୍ଟ ଖାରଜ କରିଦେଇଛନ୍ତି ।
ସାମାଜିକ ଗଣମାଧ୍ୟମରେ ବର୍ଷାଙ୍କ ଛବି ଖରାପ କରାଯାଉଥିବାକୁ ନେଇ ବର୍ଷା ଅଭିଯୋଗ କରିଥିଲେ, ଯାହାକୁ ନେଇ କୋର୍ଟରେ ଆବେଦନ ମଧ୍ୟ କରିଥିଲେ । ଯେଉଁ ପିଟିସନକୁ କୋର୍ଟ ଏବେ ଖାରଜ କରିଦେଇଛନ୍ତି । ଯେହେତୁ ଏ ସଂକ୍ରାନ୍ତୀୟ ମାମଲା ହାଇକୋର୍ଟରେ ବିଚାରାଧୀନ ରହିଛି, ତେଣୁ ଏପରି ଅନ୍ୟ ଏକ ପିଟିସନ ଗ୍ରହଣୀୟ ହେବ ନାହିଁ ବୋଲି ଏସଡିଜିଏମ ଅଦାଲତ କହିଛନ୍ତି ।
ଏହା ଥିଲା ଦ୍ୱିତୀୟ ଝଟକା ଏବଂ ତୃତୀୟ ଝଟକାଟି ହେଉଛି, ଯେଉଁ ପିଟିସନ ଜରିଆରେ ବର୍ଷା ଦର୍ଶାଇଥିଲେ କି ତାଙ୍କ ମୂଳ ଆବେଦନରେ କିଛି ସଂଶୋଧନ କରିବାକୁ ଅନୁମତି ଦିଆଯାଉ । କିନ୍ତୁ ଅଦାଲତି ପ୍ରକ୍ରିୟାରେ ଯେହେତୁ ବିଳମ୍ବ ହେବାର ସମ୍ଭାବନା ଥିବାରୁ କୋର୍ଟ ବର୍ଷାଙ୍କ ଏହି ଆବେଦନକୁ ମଧ୍ୟ ଖାରଜ କରିଦେଇଛନ୍ତି । ଆଉ ଏଭଳି କିଛି ନ୍ୟାୟ ପ୍ରକାଶ ପାଇବାପରେ ଏକ ନୁହେଁ, ଦୁଇ ନୁହେଁ, ତିନି ତିନୋଟି ଝଟକା ବର୍ଷାଙ୍କୁ ଲାଗିଛି । ତେବେ ଦେଖିବାକୁ ବାକି ରହିଲା ଏ ପରିବାର ଭିତରେ ଉଠିଥିବା ଝଡ କେବେ ଶୀତଳ ପଡୁଛି ।
