କମିଲା ବିଦେଶୀ ମଦ ଓ ୱାଇନ୍ ଦାମ ,ଆଉ ନୂତନ ୧୦ଟି ପ୍ରିମିୟମ୍ ଠିପିବନ୍ଦ ମଦ ଦୋକାନ ଖୋଲିବ

ଆଜି ଏପ୍ରିଲ ପହିଲାରୁ ସମଗ୍ର ରାଜ୍ୟରେ ନୂଆ ମଦ ଦରକୁ ଲାଗୁ କରାଯାଇଛି। ୨୦୨୨-୨୩ ଆର୍ଥିକ ବର୍ଷରେ ରାଜ୍ୟରେ ‘ଠିପିବନ୍ଦ ମଦ ଦୋକାନ’ ଓ ‘ଦେଶୀ ମଦ ଦୋକାନ’ ଖୋଲିବ ନାହିଁ। ପରୀକ୍ଷାମୂଳକ ଆରମ୍ଭ ହୋଇଥିବା ‘ପ୍ରିମିୟମ ଠିପି ବନ୍ଦ ମଦ ଦୋକାନ’କୁ ନେଇ ଲୋକମାନଙ୍କ ମଧ୍ୟରେ ଅଧିକ ଉତ୍ସାହକୁ ଦୃଷ୍ଟିରେ ରଖି ଆଉ ୧୦ଟି ଏଭଳି ଦୋକାନ ଖୋଲିବା ପାଇଁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ଏସବୁ ବ୍ୟତୀତ ପଡ଼ୋଶୀ ରାଜ୍ୟଗୁଡ଼ିକରେ ମଧ୍ୟ ବିକ୍ରି ହେଉଥିବା ମଦ ଦର ସହିତ ରହିଥିବା ବିସଙ୍ଗତିକୁ ଦୂର କରିବା ପାଇଁ ଓଡ଼ିଶା ସରକାର ଉଚ୍ଚମାନର ବିଦେଶୀ ତିଆରି ବିଦେଶୀ ମଦ(ଏଫଏମଏଫଏଲ) ଓ ୱାଇନ ଉପରକୁ ଅବକାରୀ ଶୁଳ୍କକୁ ହ୍ରାସ କରିଛନ୍ତି। ତେବେ ବିୟର ଓ ଭାରତରେ ପ୍ରସ୍ତୁତ ବିଦେଶୀ ମଦ ଉପରେ ଅବକାରୀ ଶୁଳ୍କ ଅପରିବର୍ତ୍ତିତ ରହିଛି।

ରାଜ୍ୟ ଅବକାରୀ ବିଭାଗ ତରଫରୁ ଜାରି ୨୦୨୨-୨୩ କରାଯାଇଥିବା ଆର୍ଥିକ ବର୍ଷର ‘ନୂଆ ଅବକାରୀ ନୀତି’ ରେ ଲାଇସେନ୍ସ ଫି’, ଏମଜିକ୍ୟୁ(ନିଶ୍ଚିତ ସର୍ବନିମ୍ନ ପରିମାଣ) ଓ ମଦ ତିଆରି ପାଇଁ ଆବେଦନ ଫି’ରେ ସାମାନ୍ୟ ବୃଦ୍ଧି ହୋଇଛି। ତେବେ ପଡ଼ୋଶୀ ରାଜ୍ୟ ଓ ଓଡ଼ିଶାରେ ବିକ୍ରି ହେଉଥିବା ମଦର ଦରରେ ରହିଥିବା ପାର୍ଥକ୍ୟକୁ ଦୂର କରିବା ପାଇଁ ତଥା ରାଜ୍ୟରେ ଭଲ ବିଦେଶୀ ବ୍ରାଣ୍ଡର ମଦର ବିକ୍ରିକୁ ପ୍ରୋତ୍ସାହିତ କରିବା ପାଇଁ ଏଫଏମଏଫଏଲ ଉପରେ ଅବକାରୀ ଶୁଳ୍କକୁ ପ୍ରାୟ ୧୫ ରୁ ୨୦ ପ୍ରତିଶତ ହ୍ରାସ କରିଛନ୍ତି। ସେହିପରି ୱାଇନ ଉପରେ ୧୦ ରୁ ୧୫ ପ୍ରତିଶତ ଶୁଳ୍କ ହ୍ରାସ ହୋଇଥିବାର ଜଣାପଡ଼ିଛି। ଭାରତ ତିଆରି ବିଦେଶୀ ମଦ(ଆଇଏମଏଫଏଲ) ଓ ବିୟର ଉପରେ ଅବକାରୀ ଶୁଳ୍କ ପୂର୍ବପରି ଅପରିବର୍ତ୍ତିତ ରହିଛି।

ସେହିପରି ୨୦୨୧-୨୨ ମସିହା ଆର୍ଥିକ ବର୍ଷରେ ଭୁବନେଶ୍ୱର ଓ କଟକରେ ଆରମ୍ଭ ହୋଇଥିବା ‘ପ୍ରିମିୟମ ଠିପି ବନ୍ଦ ମଦ ଦୋକାନ’କୁ ନେଇ ଲୋକମାନଙ୍କ ମଧ୍ୟରେ ଉତ୍ସାହକୁ ଦୃଷ୍ଟିରେ ରଖି ସମଗ୍ର ରାଜ୍ୟରେ ୨୦୨୨-୨୩ ମସିହାରେ ଏଭଳି ଆଉ ୧୦ଟି ପ୍ରିମିୟମ ଠିପିବନ୍ଦ ମଦ ଦୋକାନ ଖୋଲିବା ପାଇଁ ନିଷ୍ପତ୍ତି ନିଆଯାଇଛି। ବର୍ତ୍ତମାନ ଭୁବନେଶ୍ୱରରେ ୩ଟି, କଟକରେ ଗୋଟିଏ ଓ ଭୁବନେଶ୍ୱର ବିମାନ ବନ୍ଦର ପରିସରରେ ଗୋଟିଏ ପ୍ରିମିୟମ ଅଫ୍ ସପ୍ ରହିଛି। ୨୦୨୨-୨୩ ମସିହାରେ ଭୁବନେଶ୍ୱରରେ ଆଉ ୩ଟି ଏଭଳି ଦୋକାନ ଖୋଲିବା ପାଇଁ ନିଷ୍ପତ୍ତି ନିଆଯାଇଛି। ସେହିପରି ବ୍ରହ୍ମପୁର,ସମ୍ବଲପୁର ଓ ରାଉରକେଲା ସମେତ ବାଲୋଶ୍ୱର, ଝାରସୁୁଡ଼ା, ବଡ଼ବିଲ ଓ ଅନୁଗୁଳରେ ଗୋଟିଏ ଲେଖାଏଁ ପ୍ରିମିୟମ ଠିପିବନ୍ଦ ମଦ ଦୋକାନ ଖୋଲାଯିବ। ଏହି ଦୋକାନଗୁଡ଼ିକ ପାଇଁ କୌଣସି ଏମଜିକ୍ୟୁ ରହିବ ନାହିଁ। ଏହି ମଦଦୋକାନ ବିଭିନ୍ନ ସପିଂ ମଲ ଓ ବ୍ୟବସାୟିକ ପେଣ୍ଠସ୍ଥଳୀରେ ଖୋଲିବା ପାଇଁ ପ୍ରୋତ୍ସାହିତ କରାଯିବ। ସର୍ବନିମ୍ନ ୭୫୦ ବର୍ଗଫୁଟ୍ ଅଂଚଳରେ ଏହି ଦୋକାନ ରହିବ ଓ ସବୁ ପ୍ରିମିୟମ ବ୍ରାଣ୍ଡର ସବୁ ପ୍ରକାରର ମଦ ସେଠାରେ ଉପଲବ୍ଧ ହେବ। ଏହି ଦୋକାନ ସମ୍ପୂର୍ଣ୍ଣ ଶୀତତାପ ନିୟନ୍ତ୍ରିତ ଓ ଏହାର ସାଜସଜ୍ଜା ଉପରେ ମଧ୍ୟ ଗୁରୁତ୍ୱ ଦିଆଯିବ। ଏହି ଦୋକାନର ୨୦ ପ୍ରତିଶତ ଅଂଚଳରେ ସିଗାର, ଲିକର ଚକୋଲେଟ୍‌, ଆଇସ ବକ୍ସ, ଭଲ ବ୍ରାଣ୍ଡର ମଦ ପିଇବା ଗ୍ଲାସ, ଉଚ୍ଚମାନର ପେଣ୍ଟିଂ ଆଦି ମଧ୍ୟ ବିକ୍ରି ହେବ। ସ୍ୱଳ୍ପ ପରିମାଣର ଆଲକହଲ୍ ପାନୀୟକୁ ପ୍ରୋତ୍ସାହିତ କରିବା ପାଇଁ ମାଇକ୍ରୋବ୍ରିଓରୀ ନୀତିକୁ ପୁନଃସଂଶୋଧନ କରାଯାଇଛି। ଯେଉଁଠି ବିନା ରେଷ୍ଟୁରାଂଟରେ ବାର ରହିଛି ସେଥିପାଇଁ ସ୍ୱତନ୍ତ୍ର ଫି’ ମଧ୍ୟ ନିର୍ଦ୍ଧାରଣ କରାଯିବ। ରାଜ୍ୟ ସରକାରଙ୍କ ଫାଇଭ-ଟି କାର୍ଯ୍ୟକ୍ରମ ଅନ୍ତର୍ଗତ ପରମିଟ, ପାସ, ଲାଇସେନ୍ସ ଓ ପେମେଣ୍ଟ ଆଦି ପ୍ରକ୍ରିୟାକୁ ସ୍ୱୟଂଚାଳିତ କରାଯାଇଛି।

ମହୁଆ ଫୁଲ ଉପଲବ୍ଧ ହେଉଥିବା ସ୍ଥାନରେ ଏହାର ବିକ୍ରି ପାଇଁ ଅନୁମତି ଦିଆଯିବ। ମହୁଆ ଫୁଲର ରପ୍ତାନୀ, ଆମଦାନୀ ଓ ପରିବହନ (ଓଏସ୍ ମ୍ୟାନୁଫାକଚରର) ପାଇଁ କ୍ୱିଣ୍ଟାଲ ପିଛା ଦରକୁ ବୃଦ୍ଧି କରାଯାଇଛି। ମହୁଆ ଫୁଲର ଉପଯୋଗ ଓ ଅନୁପଯୋଗ ଫି’ କ୍ୱିଣ୍ଟାଲ ପିଛା ୧୧୦୦ଟଙ୍କା ଥିବା ସମୟରେ ତାକୁ ୧୨୫୦ଟଙ୍କାକୁ ବୃଦ୍ଧି କରାଯାଇଛି। ସେହିପରି ମହୁଆ ଫୁଲର ପରିବହନ ଫି’ କ୍ୱିଣ୍ଟାଲ ପିଛା ୫୦ଟଙ୍କା ବଦଳରେ ୬୦ଟଙ୍କା କରାଯାଇଛି। ରାଜ୍ୟ ସରକାରଙ୍କର ଏହି ଅବକାରୀ ନୀତି ଆଧାରରେ ରାଜ୍ୟ ମଦ ନିଗମ ତରଫରୁ ୫୫ପୃଷ୍ଠାର ରେଟ୍ ଚାର୍ଟ ମଧ୍ୟ ଜାରି କରାଯାଇଛି। ଯାହାକି ୨୦୨୩ ମାର୍ଚ୍ଚ ଶେଷ ପର୍ଯ୍ୟନ୍ତ ବଳବତ୍ତର ରହିବ ବୋଲି ଉଲ୍ଲେଖ କରାଯାଇଛି। ଯଦି ଏମ୍‌ଆର୍‌ପି ତୁଳନାରେ କେହି ଅଧିକ ଦାମ୍‌ରେ ମଦ ବିକ୍ରି କରୁଥିବା ପ୍ରମାଣ ମିଳେ ତେବେ ସେମାନଙ୍କର ଲାଇସେନ୍ସକୁ ନିଲମ୍ବନ କରାଯିବ।