ଘରେ ପଶିଥିବା 3ଜଣ ଚୋରଙ୍କ ସହିତ ଏକୁଟିଆ ଲଢେଇ କଲେ 20 ବର୍ଷର ଛାତ୍ରୀ, ସାହାସ ଦେଖି ପଳାଇଗଲେ ଚୋରମାନେ
Get real time updates directly on you device, subscribe now.
ଝିଅମାନଙ୍କୁ ଶିକ୍ଷା ଦିଆଯାଉଥିବା ଆତ୍ମରକ୍ଷାର ଟେକନିକ କେତେ କାମରେ ଆସିପାରେ, ଏହାର ବଡ ଉଦାହରଣ ଗୁଜୁରାଟର ସୁରଟରୁ ସାମ୍ନାକୁ ଆସିଛି । ସୁରଟର ପଲସାନା ଗାଁରେ ଗୋଟିଏ ଘରେ ଚୋରି କରିବା ଉଦ୍ଦେଶ୍ୟରେ ପଶିଥିବା ତିନିଜଣ ଚୋରଙ୍କର ପାଠ ପଢୁଥିବା ଛାତ୍ରୀ ସହିତ ସାମ୍ନାସାମ୍ନୀ ହୋଇଗଲା । ଛାତ୍ରୀ ନିଜ ଜୀବନକୁ ଖାତିର ନ କରି ଚୋରମାନଙ୍କୁ ସାମ୍ନା କଲେ । ସେ ଆହତ ମଧ୍ୟ ହୋଇଗଲେ, ଏହା ସତ୍ତ୍ବେ ମଧ୍ୟ ସାହାସ ଦେଖାଇ ଚୋରମାନଙ୍କୁ ପଳାଇ ଯିବାପାଇଁ ବାଧ୍ୟ କରିଦେଲେ ।
ସୂଚନା ଅନୁଯାୟୀ, ସୁରଟର ପଲସାନା ଥାନା ଅଞ୍ଚଳର ଚଲଥାନ ଅଞ୍ଚଳରେ ରାତି ସାଢେ଼ ଗୋଟେ ସମୟରେ ଚୋରମାନେ ଛୁରୀ ଧରି ଘରେ ପଶିଗଲେ । ଘରେ ପଶିବାପାଇଁ ଚୋରମାନେ ପ୍ରଥମେ ମୁଖ୍ୟ କବାଟର ଶିକୁଳିକୁ ଭାଙ୍ଗିଦେଲେ । ଚୋରମାନଙ୍କୁ ଘରେ ପଶିବାର ଶବ୍ଦ ଘରେ ପାଠ ପଢୁଥିବା 20 ବର୍ଷୀୟ ଛାତ୍ରୀ ରିୟା ଜାଣିବାପରେ ସେ ସତର୍କ ହୋଇଗଲେ ।
3ଜଣ ଚୋରଙ୍କ ସାମ୍ନାରେ ଛାତ୍ରୀ ହରାଇଲେ ନାହିଁ ସାହାସ :-
ଚୋରି କରିବା ଉଦ୍ଦେଶ୍ୟରେ ଘରେ ପଶିଥିବା ଚୋର ଛୁରୀ ନେଇ ରିୟାଙ୍କ ଆଡ଼କୁ ବଢିବାରୁ ସେ ନିଜକୁ ରକ୍ଷା କରିବାପାଇଁ ଚୋରମାନଙ୍କ ସହିତ ଲଢେଇ କଲେ । 3ଜଣ ଚୋରଙ୍କ ସାମ୍ନାରେ ଏକୁଟିଆ ଛାତ୍ରୀ ସାହାସ ହରାଇଲେ ନାହିଁ । ଚୋରମାନେ ତାଙ୍କ ଉପରେ ଛୁରୀ ଦ୍ଵାରା ଆକ୍ରମଣ କଲେ । ହାତରୁ ରକ୍ତ ବାହାରୁଥିଲା, ତଥାପି ସେ ସାମ୍ନା କଲେ । ଶବ୍ଦ ଶୁଣି ତାଙ୍କ ବାପାମାଆ ଏବଂ ସାନ ଭଉଣୀ ମଧ୍ୟ ଉଠିପଡିଲେ ।
ପରୀକ୍ଷା କାରଣରୁ ରାତିରେ ପାଠ ପଢୁଥିଲେ ଛାତ୍ରୀ :-
ଛାତ୍ରୀଙ୍କ ସାହାସ ଦେଖି ଚୋରମାନେ ବାଧ୍ୟ ହୋଇ ପଳାଇଗଲେ । ଚୋରମାନଙ୍କ ଆକ୍ରମଣରେ ଆହତ ରିୟା ପରୀକ୍ଷା କାରଣରୁ ରାତିରେ ପାଠ ପଢୁଥିଲେ । ସେହି ସମୟରେ ଘରର ପଛ ପଟେ ଚୋରମାନେ ପଶି ଆସିଥିଲେ । ତେବେ କଲେଜରେ ଶିଖା ଯାଇଥିବା ଆତ୍ମରକ୍ଷା ଟେକନିକର କିଛି ଷ୍ଟେପ କୁ ମନେ ପକାଇ ନିର୍ଭୟ ହୋଇ ରିୟା ଚୋରମାନଙ୍କର ସାମ୍ନା କଲେ ।
ଚୋରମାନେ ଘରକୁ ଲୁଟିବା ଉଦ୍ଦେଶ୍ୟରେ ଆସିଥିଲେ । ଜଣେ ଚୋର ଛାତ୍ରୀଙ୍କ ଭଉଣୀ ଉପରେ ମଧ୍ୟ ଆକ୍ରମଣ କରିବାକୁ ଚେଷ୍ଟା କଲା । କିନ୍ତୁ ଛାତ୍ରୀ ତୁରନ୍ତ ଚୋର ଆଡ଼କୁ ଦୌଡିଲେ ଏବଂ ତାକୁ ଠେଲିଦେଲେ । ବର୍ତ୍ତମାନ ଛାତ୍ରୀଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ପୋଲିସ ବର୍ତ୍ତମାନ ଯାଞ୍ଚ କରିବା ଆରମ୍ଭ କରିଦେଇଛି ।
