“ମହିଳାଙ୍କ ଗାଲରେ ଭୁଲରେ ଓଠ ବାଜି ନାହିଁ, ତୁମେ ଜାଣିଶୁଣି କିସ କରିଛନ୍ତି”, କୋର୍ଟ ଦେଲା 1 ବର୍ଷର ଜେଲଦଣ୍ଡ

ମହିଳାଙ୍କୁ ତାଙ୍କ ଇଚ୍ଛା ବିରୋଧରେ ଜାଣିଶୁଣି କିସ କରିବା ମାମଲାରେ ଅଭିଯୁକ୍ତ ବ୍ୟକ୍ତିଙ୍କୁ କୋର୍ଟ ଦୋଷୀ ସାବ୍ୟସ୍ତ କରିଛି ଏବଂ ତାଙ୍କୁ ଏକ ବର୍ଷ ପାଇଁ କଠୋର ଦଣ୍ଡ ଶୁଣାଇଛି । ମୁମ୍ବାଇ ଅଦାଲତ ଜଣେ ଦୋଷୀ ବ୍ୟକ୍ତି ଉପରେ 10 ହଜାର ଟଙ୍କାର ଜୋରିମାନା ମଧ୍ୟ କରିଛନ୍ତି । 37 ବର୍ଷୀୟ ଏହି ବ୍ୟକ୍ତି ମୁମ୍ବାଇର ଲୋକାଲ ଟ୍ରେନରେ ମହିଳାଙ୍କୁ କିସ କରିଦେଇଥିଲେ । ଏହି ଘଟଣା 2015 ମସିହାର ଅଟେ ।

କୋର୍ଟ ଅଭିଯୁକ୍ତଙ୍କ ଦଲିଲକୁ ଖାରଜ କଲା :-

ଦୋଷୀ ବିଜନେସମ୍ୟାନ କୋର୍ଟରେ କହିଥିଲେ ଯେ ସେ ଏପରି ଜାଣିଶୁଣି କରିନଥିଲେ ବରଂ ପାଖରେ ଠିଆ ହୋଇଥିବା ବ୍ୟକ୍ତି ତାଙ୍କୁ ଧକ୍କା ଦେଇ ଦେଇଥିଲେ । ଯାହାପରେ ସେ ସାମ୍ନାରେ ବସିଥିବା ମହିଳାଙ୍କ ଉପରେ ପଡିଗଲେ ଏବଂ ତାଙ୍କ ଓଠ ତାଙ୍କ ଗାଲରେ ବାଜି ଯାଇଥିଲା । କିନ୍ତୁ କୋର୍ଟ ତାଙ୍କର ସବୁ ଦଲିଲକୁ ଖାରଜ କରି ଦଣ୍ଡ ଘୋଷଣା କରିଦେଲା ।

କୋର୍ଟ କହିଲା ଏହି କଥା :-

ଇଂରାଜୀ ଖବର କାଗଜ ଟାଇମ୍ସ ଅଫ ଇଣ୍ଡିଆର ଗୋଟିଏ ରିପୋର୍ଟ ଅନୁଯାୟୀ 37 ବର୍ଷର କିରଣ ହୋନାବରଙ୍କୁ ମେଟ୍ରୋପଲିଟନ ମାଜିଷ୍ଟ୍ରେଟ ବିପି କେଦାର ଦୋଷୀ କରିଛନ୍ତି । ମାଜିଷ୍ଟ୍ରେଟ କହିଛନ୍ତି ଯେ FIR ରୁ ଜଣାପଡୁଛି ଯେ ଟ୍ରେନରେ ଚଢ଼ିବା ପରେ ଅଭିଯୁକ୍ତ ମହିଳାଙ୍କ ସାମ୍ନାରେ ବସିଗଲା ଏବଂ ତାଙ୍କୁ ଦେଖୁଥିଲା । ସେ କହିଛନ୍ତି, ” ମହିଳାମାନଙ୍କ ମଧ୍ୟରେ ଅଶାବ୍ଦିକ ସଙ୍କେତକୁ ବୁଝିବାର ଜନ୍ମଗତ କ୍ଷମତା ରହିଥାଏ । ଏହାସହିତ ଛୋଟ ବିବରଣୀ ପାଇଁ ଗଭୀର ଦୃଷ୍ଟି ଥାଏ । ତେଣୁ ଏହା କୁହାଯାଇପାରିବ ନାହିଁ ଯେ ମହିଳା ଅଜାଣତରେ ଏହି ଦୋଷ ଲଗାଇଥିଲେ ।”

ଡାହାଣ ଗାଲରେ କଲେ କିସ :-

ରିପୋର୍ଟରେ କୁହାଯାଇଛି ଯେ ମହିଳା ଏବଂ ତାଙ୍କ ସାଙ୍ଗ ସାକ୍ଷୀ ଥିଲେ । ଦୁହେଁ ସାକ୍ଷୀ ଦେଇଥିଲେ । ଏହାବ୍ୟତୀତ ଅନ୍ୟ ଦୁଇଜଣ ଲୋକ ମଧ୍ୟ ସାକ୍ଷୀ ଦେଲେ । ସେମାନେ ଦେଖିଥିଲେ ଯେ ମହିଳା ପାଟି କରିବା ପରେ ସାଥୀ ଯାତ୍ରୀମାନେ ଅଭିଯୁକ୍ତଙ୍କୁ ସେ ସମୟରେ ପିଟିଥିଲେ । କୋର୍ଟ କହିଛି, ” ପ୍ରତ୍ୟକ୍ଷ, ଠୋସ ଏବଂ ସକାରାତ୍ମକ ପ୍ରମାଣରୁ ପ୍ରମାଣିତ ହୁଏ ଯେ ଅଭିଯୁକ୍ତ ମହିଳାଙ୍କ ଡାହାଣ ଗାଲରେ ଜାଣିଶୁଣି କିସ କରିଥିଲେ ।

କଏଦ ସହିତ ଜୋରିମାନାର ଦଣ୍ଡ :-

ଅଦାଲତ ଦୋଷୀ ବିଜନେସମ୍ୟାନଙ୍କ ଉପରେ 10 ହଜାର ଟଙ୍କାର ଜୋରିମାନା ମଧ୍ୟ କରିଛନ୍ତି । ଅଦାଲତ କହିଛି ଯେ ଯଦି ଆଦାୟ କରାଯାଏ, ତେବେ ମହିଳାଙ୍କୁ କ୍ଷତିପୂରଣ ଭାବରେ 5000 ଟଙ୍କା ଦେବାକୁ ପଡିବ । ତେବେ ଏହି କେସରେ ସର୍ବାଧିକ ଦଣ୍ଡ ପାଞ୍ଚବର୍ଷ ଜେଲ ହୋଇଥାଏ, କିନ୍ତୁ ଅଦାଲତ ସେହି ବ୍ୟକ୍ତିଙ୍କୁ କେବଳ ଏକ ବର୍ଷର ଜେଲ ଦଣ୍ଡ ଶୁଣାଇଛି । ଅଦାଲତ କହିଛି, ” ଅଭିଯୁକ୍ତଙ୍କ ବିରୋଧରେ ଅପରାଧିକ ଇତିହାସର କୌଣସି ପ୍ରମାଣ ନାହିଁ । ସେ ନିଜ ପରିବାରରେ ରୋଜଗାର କରୁଥିବା ଏକମାତ୍ର ବ୍ୟକ୍ତି ଅଟନ୍ତି ।”