ଆସନ୍ତା ୩୧ ତାରିଖରୁ ଆଇପିଏଲ୍ ୨୦୨୩ର ସଂସ୍କରଣ ଆରମ୍ଭ ହେବାକୁ ଯାଉଛି । ଏଥିରେ ୧୦ଟି ଟିମ୍ ଟ୍ରଫି ପାଇଁ ଲଢେଇ କରିବେ । ଏହି ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚରେ ଗୁଜରାଟ ଟାଇଟାନ୍ସ ଓ ଚେନ୍ନାଇ ସୁପର କିଙ୍ଗସ ପରସ୍ପରକୁ ଭେଟିବେ । ତେବେ ଆଇପିଏଲର ଏହି ସଂସ୍କରଣ ପାଇଁ କିଛି ଗୁରୁତ୍ତ୍ୱପୂର୍ଣ୍ଣ ନିୟମରେ ପରିବର୍ତ୍ତନ କରାଯାଇଛି ।
ଏହି ସମସ୍ତ ନିୟମ ଆଇପିଏଲରେ ବୃହତ ପରିବର୍ତ୍ତନ ଆଣିଦେବାର ସମ୍ଭାବନା ରହିଛି । ଆଇପିଏଲରେ ଏଥର ୫ଟି ବଡ଼ ତଥା ନୂଆ ନିୟମ କିଛି ସାମିଲ ହେବାକୁ ଯାଉଛି । ଯାହା ଫଳରେ ଆଇପିଏଲ ପୂର୍ବାପେକ୍ଷା ବେଶ ରୋମାଞ୍ଚକର ହେବାକୁ ଯାଉଛି । ତେବେ ଏହି ନୂଆ ନିୟମ ଆଇପିଏଲର ପୂରା ରୂପରେଖକୁ ବଦଳାଇ ରଖିଦେବାର ସମ୍ଭାବନା ଯଥେଷ୍ଠ ଅଧିକ ରହିଛି ।
ତେବେ ଏହି ଫଟାଫଟ ମନୋରଞ୍ଜନର ଖୋରାକ ଯୋଗାଉଥିବା କ୍ରିକେଟ ଟୁର୍ଣ୍ଣାମେଣ୍ଟ ଆରମ୍ଭ ହେବାକୁ ଆଉ ଗୋଟିଏ ସପ୍ତାହ ରହିଛି । ଆସନ୍ତୁ ଥରେ ନଜର ପକାଇବା ଏହି ପରିବର୍ତ୍ତନ ଉପରେ ।
୧. ଟସ ପରେ ଚୂଡ଼ାନ୍ତ ଏକାଦଶରେ ପରିବର୍ତନ :- ଆଇପିଏଲ ୨୦୨୩ରେ ଟସ ପରେ ସମସ୍ତ ୧୦ଟି ଦଳର ଅଧିନାୟକ ସେମାନଙ୍କ ଦଳର ଚୂଡ଼ାନ୍ତ ଏକାଦଶରେ ପରିବର୍ତ୍ତନ କରିପାରିବେ । ଅଧିନାୟକ ଟସ୍ ପାଇଁ ସେମାନେ ଦୁଇଟି ଭିନ୍ନ ଦଳ ସିଟ୍ ସହିତ ଯିବେ ।
ଏହାପୂର୍ବରୁ, ଆଇପିଏଲରେ ଟସ୍ ପୂର୍ବରୁ ଅଧିନାୟକଙ୍କୁ ମ୍ୟାଚ୍ ରେଫରିଙ୍କୁ ଏକାଦଶ ଖେଳିବାର ସିଟ୍ ଦେବାକୁ ପଡୁଥିଲା, କିନ୍ତୁ ବର୍ତ୍ତମାନ ନୂଆ ନିୟମ ଅନୁଯାୟୀ ଟସ୍ ପରେ ଅଧିନାୟକ ପରିସ୍ଥିତି ଉପରେ ନିର୍ଭର କରି ମ୍ୟାଚ ଖେଳିବା ପାଇଁ ଚୂଡ଼ାନ୍ତ ଏକାଦଶରେ ପରିବର୍ତ୍ତନ କରିପାରିବେ
ଖେଳୁଥିବା ଏକାଦଶ ସିଟରେ ପାଞ୍ଚ ଜଣ ରିଜର୍ଭ ଖେଳାଳିଙ୍କ ନାମ ରଖିବା ବାଧ୍ୟତାମୂଳକ ହେବ । ଏହି ପରିବର୍ତ୍ତନ ଫ୍ରାଞ୍ଚାଇଜମାନଙ୍କୁ ସେମାନଙ୍କର ଚୂଡ଼ାନ୍ତ ଏକାଦଶ ବାଛିବାରେ ସାହାଯ୍ୟ କରିବ । ଆଗାମୀ ସଂସ୍କରଣରେ ଇମ୍ପାକ୍ଟ ପ୍ଲେୟାର ନିୟମ ମଧ୍ୟ ଲାଗୁ ହେବାକୁ ଯାଉଛି
୨. ଓ୍ୱାଇଡ଼ ଓ ନୋ-ବଲ ପାଇଁ ମଧ୍ୟ ରହିବ ଡିଆରଏସ ସୁବିଧା :- ପୂର୍ବାପେକ୍ଷା ରୋମାଞ୍ଚକର, ନ୍ୟାୟଯୁକ୍ତ ଏବଂ ଉନ୍ନତ କରିବା ପାଇଁ ଆଇପିଏଲ ୨୦୨୩ ମଧ୍ୟ ୱାଇଡ୍ ଏବଂ ନୋ-ବଲ୍ ପାଇଁ ଡିଆରଏସ ପାଇବ । ପୂର୍ବରୁ ଖେଳାଳିମାନେ କେବଳ ଆଉଟ କିମ୍ବା ନଟ ଆଉଟର ଫଳାଫଳ ଜାଣିବାକୁ ଡିଆରଏସର ବ୍ୟବହାର କରୁଥିଲେ ।
କିନ୍ତୁ ଆଗାମୀ ସଂସ୍କରଣରେ ଓ୍ୱାଇଡ଼ କିମ୍ବା ନୋ ବଲ ପାଇଁ ମଧ୍ୟ ଡିଆରଏସ ବ୍ୟବହାର ହେବ । କହି ରଖୁ କି ଆଇପିଏଲର ବିଗତ କିଛି ମ୍ୟାଚରେ ଓ୍ୱାଇଡ଼ ଓ ନୋ ବଲ ଦେବାରେ ଗୁରୁତର ଭୁଲ କରିଥିବା ଦେଖିବାକୁ ମିଳିଛି । ଏହାକୁ ନେଇ ଟିମ ଗୁଡ଼ିକୁ ମ୍ୟାଚ ହାରିଯିବା ସହିତ ବହୁମୂଲ୍ୟ ଦେବାକୁ ପଡ଼ିଛି । ତେବେ ଓ୍ୱାଇଡ଼ ଓ ନୋ ବଲ ପାଇଁ ଡିଆରଏସ ମିଳିଲେ ଖେଳାଳିମାନଙ୍କୁ ବହୁ ମାତ୍ରାରେ ଆଶ୍ୱସ୍ତି ମିଳିପାରିବ
୩. ଇମ୍ପାକ୍ଟ ପ୍ଲେୟାର ରୁଲ :- ଇମ୍ପାକ୍ଟ ପ୍ଲେୟାର ନିୟମ ଆଇପିଏଲ ୨୦୨୩କୁ ଅତ୍ୟନ୍ତ ରୋମାଞ୍ଚକର କରିବ । ଟସ୍ ସମୟରେ ଅଧିନାୟକଙ୍କୁ ଟିମ୍ ସିଟରେ ଚୂଡ଼ାନ୍ତ ଏକାଦଶ ଖେଳାଳିଙ୍କ ସହିତ ଅତିରିକ୍ତ ୫ ଜଣ ଖେଳାଳିଙ୍କ ନାମ ମଧ୍ୟ ରିଜର୍ଭ ଖେଳାଳି ଭାବେ ରଖିବାକୁ ହେବ ।
ଗୋଟିଏ ଇନିଂସର ୧୪ ତମ ଓଭର ଶେଷ ହେବା ପୂର୍ବରୁ ଏହି ରିଜର୍ଭ ଖେଳାଳିଙ୍କ ମଧ୍ୟରୁ କୌଣସି ଜଣକୁ ଇମ୍ପାକ୍ଟ ଖେଳାଳି ଭାବେ ବ୍ୟବହାର କରିପାରିବେ । ଏହି ଖେଳାଳି ଚୂଡ଼ାନ୍ତ ଏକାଦଶର କୌଣସି ବ୍ୟାଟସମ୍ୟାନ କିମ୍ବା ବୋଲରଙ୍କ ସ୍ଥାନରେ ପ୍ରଦର୍ଶନ କରିପାରିବେ । ତେବେ ଯଦି କୌଣସି କାରଣରୁ ଓଭରର କମ କରାଯାଏ ତେବେ ଏହି ଇମ୍ପାକ୍ଟ ପ୍ଲେୟରଙ୍କୁ ବ୍ୟବହାର କରାଯାଇପାରିବ ନାହିଁ ।
୪. ଓ୍ୱିକେଟ କିପର କିମ୍ବା ଫିଲ୍ଡରଙ୍କ ଭୁଲ ପୁରା ଦଳକୁ ଭୋଗିବାକୁ ହେବ :- ଆଇପିଏଲ ୨୦୨୩ ସଂସ୍କରଣରେ ଯଦି କୌଣସି ମ୍ୟାଚରେ ଓ୍ୱିକେଟ କିପର କିମ୍ବା ଫିଲଡର ବ୍ୟାଟସମ୍ୟାନ ଖେଳିବା ପୂର୍ବରୁ ପୋଜିସନରେ ପରିବର୍ତ୍ତନ କଲେ ତେବେ ଅମ୍ପାୟାର ସେହି ବଲକୁ ଡେଡ ଘୋଷଣା କରିଦେବେ । ଏହା ସହିତ ବ୍ୟାଟିଂ କରୁଥିବା ଦଳର ଖାତାରେ ୫ରନ ଅତିରିକ୍ତ ରନ ଯୋଡ଼ି ଦିଆଯିବ ।
୫. ସ୍ଲୋ ଓଭର ରେଟ ପାଇଁ ମଧ୍ୟ ମିଳିବ ଦଣ୍ଡ :- ଆଇପିଏଲ ୨୦୨୩ ସଂସ୍କରଣର କୌଣସି ଏକ ମ୍ୟାଚରେ ଯଦି କୌଣସି ଦଳ ନିର୍ଦ୍ଧାରିତ ସମୟରେ ଓଭର ନପକାନ୍ତି ତେବେ ପ୍ରତିଟି ଓଭର ସମୟରେ ୩୦ ଗଜ ସୀମା ବାହାରେ କେବଳ ୪ ଜଣ ଫିଲ୍ଡରଙ୍କୁ ରଖିବାକୁ ନୂଆ ନିୟମରେ କୁହାଯାଇଛି ।