ଆମିଷ ଖାଇଲେ ଗୋଡେଇ ଗୋଡେଇ କାମୁଡ଼ିବ ଗୋଖର ସାପ, ଏହି ଗାଁରେ କେହି ବି ଖାଆନ୍ତିନି ମାଛ, ମାଂସ
Get real time updates directly on you device, subscribe now.
ଆମିଷ ଖାଇଲେ ଗୋଡେଇ ଗୋଡେଇ ଗୋଖର ସାପ କାମୁଡ଼ିବ, ଆଖି ଫୁଟି ଯିବ, ଛୋଟା ହେଇଯିବ । ଏକଥା ଶୁଣି ଆପଣଙ୍କୁ ନିଶ୍ଚିତ ଭାବେ ଆଶ୍ଚର୍ଯ୍ୟ ଲାଗୁଥିବ । ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଏହି ଗାଁରେ ଏପରି ବିଶ୍ୱାସ ରହିଆସିଛି । ଏହି ବିଶ୍ୱାସ ଆଜିର କି କାଲିର ନୁହେଁ ବରଂ ରାଜ ରାଜୁଡ଼ା ଅମଳରୁ ଏହି ଗାଁର ଲୋକେ ଏ କଥାକୁ ବିଶ୍ଵାସ କରି ଆସୁଛନ୍ତି । ସେଥିପାଇଁ ଏହି ଗାଁରେ କେହି ଆମିଷ ଖାଆନ୍ତି ନାହିଁ କିମ୍ବା ଏହି ଗାଁରେ ଆମିଷ ପସେ ନାହିଁ । ଏପରିକି ଏହି ଗାଁରେ କେହି ଛେଳି, କୁକୁଡା ଏବଂ ବତକ ମଧ୍ୟ ରଖନ୍ତି ନାହିଁ । ଏହି ଗାଁର କୁକୁର, ବିଲେଇ ମଧ୍ୟ ଆମିଷ ଖାଆନ୍ତି ନାହିଁ ।
ଗ୍ରାମବାସୀ କହିବା ଅନୁଯାୟୀ, ଯଦି କେହି ଆମିଷ ଖାଏ ତେବେ ତାର ଗୋଟେ ଆଖି ନିଶ୍ଚୟ ଖରାପ ହେବ କିମ୍ବା ଦେହ ଖରାପ୍ ହେବ । ସେ ପୁଣି ସେହି ଗାଁର ଠାକୁରଙ୍କ ଠାରେ ପଡ଼ିଲେ କିମ୍ବା ପୂଜାପାଠ କଲେ ଯାଇ ଆରୋଗ୍ୟ ହୁଏ । ପିଲାଟି ଦିନରୁ ସେମାନେ ଶୁଣି ଆସିଛନ୍ତି ଯେ ଯେଉଁମାନେ ଆମିଷ ଖାଆନ୍ତି, ଅନ୍ଧ ହୋଇଯାନ୍ତି, ଛୋଟା ହୋଇଯାନ୍ତି ନଚେତ୍ ଚାଲି ବୁଲି ପାରନ୍ତିନି । ଯେହେତୁ ସେମାନେ ଜନ୍ମରୁ ଆମିଷ ଖାଇନାହାନ୍ତି, ତେଣୁ ସେମାନଙ୍କୁ ସେ ଜିନିଷ ଦେଖିଲେ ଘୃଣା ଲାଗେ ।
ଢେ଼ଙ୍କାନାଳ ଜିଲ୍ଲା ଭୁବନ ବ୍ଲକକୁ ଏସିଆର ସବୁଠାରୁ ବଡ ଗାଁ ବୋଲି କୁହାଯାଏ । ସେହି ଭୁବନ ବ୍ଲକ ମଧ୍ୟରେ ବେଣ୍ଟଶାଳିଆ ଗାଁ ରହିଛି । ଏହି ବେଣ୍ଟଶାଳିଆ ଗାଁର ଲୋକେ ଆଜି ଯାଏଁ ଆମିଷର ସ୍ଵାଦ ଚାଖି ନାହାଁନ୍ତି । ନା ମାଛ ମାଂସ ନା ଅଣ୍ଡା, ଛୁଆଠୁ ବୁଢା ଯାଏଁ କେହି ବି ମାଛ ମାଂସ ଖାଇନାହାନ୍ତି । ଖାଲି ସେତିକି ନୁହେଁ, ଏହି ଗାଁରେ ବାହାଘର ହେଲେ ଭୋଜିଭାତ ସାଧା ଆଇଟମରେ ହିଁ ହୋଇଥାଏ । ଆମିଷର ଚିହ୍ନ ବର୍ଣ୍ଣ ନାହିଁ । ଆଉ ଏହି ଗାଁକୁ ସେହି ଘରୁ ଝିଅ ବୋହୂ ହୋଇ ଆସିବ, ଯେଉଁ ଘରେ କେହି ବି ଆମିଷ ଖାଉ ନଥିବେ ।
ହେଲେ କାହିଁକି ଏମିତି ? ଏପରି କେବେଠାରୁ ଚାଲିଛି ? ଏ ପରମ୍ପରା ଭିତରେ ଅନେକ କଥା ରହିଛି । ତା ଭିତରୁ ଗୋଟିଏ କଥା ହେଲା ଥରେ ଜଣେ ମାଛ ବ୍ୟବସାୟୀ ଏହି ଗାଁକୁ ପଶି ଆସିଥିଲେ । ସେତେବେଳେ ଭାଗବତ ସଙ୍କୀର୍ତ୍ତନ ଚାଲିଥାଏ ଏବଂ ଲୋକେ ତାକୁ ବାରଣ କଲେ । ହେଲେ ସେ ମାନି ନଥିଲା ଏବଂ ସେ ଗାଁ ଭିତର ଦେଇ ଯିବାରୁ ଅଧବାଟରେ ତାକୁ ଗଛରୁ ସାପ ଆସି କାମୁଡି ଦେଲା ।
ଖାଲି ସେତିକି ନୁହେଁ, ରାଜ ରାଜୁଡା ସମୟରେ ଜଣେ ରାଜା ମଧ୍ୟ ଏହି ଗ୍ରାମବାସୀଙ୍କ ଆମିଷ ନ ଖାଇବା କଥାକୁ ନାପସନ୍ଦ କରିଥିଲେ । ସେ ମଧ୍ୟ କହିଥିଲେ ଯେ ତୁମେ ଏମିତି କେଉଁ ବୈଷ୍ଣବ ଯେ ଆମିଷ ଖାଇବ ନାହିଁ । ମୁଁ ତୁମକୁ ପରୀକ୍ଷା କରିବି ଏବଂ ରାଜା ଗୋଟିଏ ମାଠିଆରେ ଏକ ଗୋଖର ସାପ ଭର୍ତ୍ତି କରି ଆଣିଲେ । ସେ ମାଠିଆ ଭିତରେ ଏକ କଉଡ଼ି ମଧ୍ୟ ପକାଇଲେ ଆଉ ଗାଁ ଲୋକଙ୍କୁ ସେ କଉଡ଼ି ଆଣିବାକୁ କହିଲେ । ଗାଁ ଲୋକ ହାତ ପୁରାଇ କଉଡ଼ି ଆଣିଲେ କିନ୍ତୁ ସାପ କାମୁଡ଼ିଲା ନାହିଁ । ରାଜା ତାପରେ ଆଶ୍ଚର୍ଯ୍ୟ ହୋଇ ମାନିଗଲେ ଏବଂ 60 ଏକର ଜାଗା ମଧ୍ୟ ଦେଇଥିଲେ ।
