ଯୌତୁକ ନ ଦେବାରୁ ସ୍ୱାମୀ ତିନିଜଣ ସାଙ୍ଗ ସହିତ ମିଶି ଘରେ କଲା ସ୍ତ୍ରୀ ସହିତ ଗଣଦୁଷ୍କର୍ମ

ୟୁପିର କାନପୁରରେ ମାନବିକତାକୁ ଲଜ୍ଜିତ କରିଥିବା ପରି ମାମଲା ସାମ୍ନାକୁ ଆସିଛି | ଜଣେ ମହିଳା ପୋଲିସ ଷ୍ଟେସନରେ ଅଭିଯୋଗ କରିଛନ୍ତି ଯେ ଦୁଇ ଲକ୍ଷ ଟଙ୍କା ଯୌତୁକ ନ ଦେବାରୁ ସ୍ୱାମୀ ନିଜର ତିନିଜଣ ସାଙ୍ଗଙ୍କ ସହିତ ମିଶି ତାଙ୍କ ସହିତ ଗଣଦୁଷ୍କର୍ମ କରିଛନ୍ତି | ଏହି ଘଟଣା ଘଟାଇବା ପାଇଁ ତାଙ୍କ ଶାଶୁ ଏବଂ ନଣନ୍ଦ ସେହି ଲୋକଙ୍କୁ ସାହାଯ୍ୟ କଲେ | ମହିଳା ଚକେରି ଥାନାରେ ଏହି ସମ୍ବନ୍ଧରେ ଏଫଆଇଆର ଲେଖାଇଛନ୍ତି | ଶାଶୁ ଏବଂ ନଣନ୍ଦଙ୍କୁ ଏହି ମାମଲାରେ ସହ-ଅଭିଯୁକ୍ତ କରାଯାଇଛି |

ମହିଳା କହିଛନ୍ତି, “ମୋର ୨୦୨୦ ରେ ବିବାହ ହୋଇଥିଲା | ସେବେଠାରୁ ଶାଶୂଘର ଲୋକେ ଲଗାତାର ଭାବେ ଦୁଇ ଲକ୍ଷ ଟଙ୍କା ଯୌତୁକ ମାଗୁଥିଲେ, କିନ୍ତୁ ମୋ ବାପଘର ଲୋକେ ଯୌତୁକ ଦେବାପାଇଁ ଅସମର୍ଥ ଥିଲେ | ଏହି କାରଣରୁ ସେହି ଲୋକମାନେ ପ୍ରାୟତଃ ମତେ ମାରପିଟ କରୁଥିଲେ | କିଛି ଦିନ ପୂର୍ବରୁ ସ୍ୱାମୀ ମତେ ଗୋଟିଏ ରୁମରେ ବନ୍ଦ କରିଦେଲା | ସେ ଫୋନରେ କଥା ହେବାକୁ ମଧ୍ୟ ମନା କରିଦେଲା | ଏହାର ଗୋଟିଏ ଦିନ ପରେ ସେ ନିଶାରେ ଆସିଲା | ସାଥିରେ ତାଙ୍କର ତିନିଜଣ ସାଙ୍ଗ ମଧ୍ୟ ଥିଲେ | ଏହି ଚାରିଜଣ ଲୋକ ମିଶି ମୋ ସହ ରୁମରେ ହିଁ ଗଣଦୁଷ୍କର୍ମ କଲେ | ଯେତେବେଳେ ମୁଁ ଏହାକୁ ବିରୋଧ କଲି, ସେତେବେଳେ ସ୍ୱାମୀ ମୋ ଉପରେ ପେଟ୍ରୋଲ ଢାଳି ନିଆଁ ଲଗାଇବାକୁ ଚେଷ୍ଟା କଲା | ମୁଁ ଯେକୌଣସି ପ୍ରକାରେ ସେଠାରୁ ବାହାରି ନିଜ ବାପଘରେ ପହଞ୍ଚିଲି | ଏହାପରେ ମୁଁ ପୋଲିସକୁ ସୂଚନା ଦେଲି |”

ଏହି ମାମଲାରେ ଚକେରି ପୋଲିସ ମହିଳାଙ୍କ ଅଭିଯୋଗ ଉପରେ ତାଙ୍କ ସ୍ୱାମୀ ଏବଂ ତିନିଜଣ ସାଙ୍ଗଙ୍କ ବିରୋଧରେ ଗଣଦୁଷ୍କର୍ମ ମାମଲା ରୁଜ୍ଜୁ କରିଛି | ପୋଲିସ ପୀଡିତାଙ୍କ ଶାଶୁ ଏବଂ ନଣନ୍ଦଙ୍କୁ ଏହି ମାମଲାରେ ସହ-ଅଭିଯୁକ୍ତ କରିଛି | ଡିସିପି ପ୍ରମୋଦ କୁମାର କହିଛନ୍ତି ଯେ ମହିଳାଙ୍କ ଅଭିଯୋଗ ଉପରେ ଏଫଆଇଆର ଲେଖିବାପରେ ମାମଲାର ଯାଞ୍ଚ କରାଯାଉଛି | ଏସିପି ମୄଗାଙ୍କ ପାଠକ ମଧ୍ୟ କହିଛନ୍ତି ଯେ ସ୍ୱାମୀ ଏବଂ ତାଙ୍କ ସାଙ୍ଗଙ୍କ ବିରୋଧରେ କେସ କରାଯାଇଛି | ଯାଞ୍ଚ ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ |

ଏହା ମଧ୍ୟରେ ଅଭିଯୁକ୍ତ ସ୍ୱାମୀ ଏବଂ ତାଙ୍କ ଘରଲୋକେ ଘରେ ତାଲା ପକାଇ ଗାଏବ ହୋଇଯାଇଛନ୍ତି | ପୀଡ଼ିତାଙ୍କ ସ୍ୱାମୀ ଗୋଟିଏ ପ୍ରତିଷ୍ଠିତ ଇଂଜିନିୟରିଂ କଲେଜରେ ପ୍ରଫେସର ଅଛନ୍ତି |