Get real time updates directly on you device, subscribe now.
ଏହା ଏକ ସାଧାରଣ ଅନୁଭୂତି ଯେ ଅନେକ ଭିତ୍ତିହୀନ ଅପପ୍ରଚାର ହଠାତ୍ ଜନମାନସରେ ଜାଗ୍ରତ ହୋଇ ଉଠିଥାଏ ଆଉ ଅତି ବେଗରେ ସମାଜରେ ଖେଳିଯାଇ ସମ୍ପୂର୍ଣ୍ଣ ସମାଜକୁ କବଳିତ କରେ । ଘଟଣାର ସତ୍ୟତା ପରୀକ୍ଷା ନ କରି ଅବିଳମ୍ବେ ଜନ ସମୁଦାୟ ଏହାକୁ ଗ୍ରହଣ କରି ନିଅନ୍ତି । ବର୍ତମାନ ସମୟରେ ଦେଖିବାକୁ ମିଳିଛି ଅନ୍ଧବିଶ୍ୱାସର ଅତି ବିକଳ ଚିତ୍ର । ସ୍ତ୍ରୀକୁ ଖୋଲା ଜାଗାରେ ଉଲଗ୍ନ ହୋଇ ଗାଧୋଇବାକୁ ବାଧ୍ୟ କଲା ପାଗଳ ସ୍ୱାମୀ ।
ତାନ୍ତ୍ରିକ କଥାରେ ପଡ଼ି ସ୍ତ୍ରୀକୁ ଏପରି କରିବାକୁ ବାଧ୍ୟ କରିଛି ଏହି ଅବୁଝା ସ୍ୱାମୀ । ମହାରାଷ୍ଟ୍ର ପୁନେ ଅନ୍ତର୍ଗତ ରତ୍ନଗିରି ଜିଲ୍ଲାରେ ଏହି ଘଟଣା ଘଟିଛି । ଏହି ଦମ୍ପତିଙ୍କର ପୁତ୍ର ସନ୍ତାନ ହେଉ ନଥିଲା । ତାକୁ ନେଇ ସ୍ୱାମୀ ତାନ୍ତ୍ରିକର ଶରଣ ପଶିଥିଲେ । ତାନ୍ତ୍ରିକ ଜଣକ ଗୁଣି ଗାରେଡି କରି ପୁତ୍ର ସନ୍ତାନ କରାଇ ଦେବାକୁ କଥା ଦେଇଥିଲା । ଏଥିରେ ମହିଳାଙ୍କୁ ଝରଣାରେ ଉଲଗ୍ନ ହୋଇ ଖୋଲାରେ ଗାଧୋଇବାକୁ ହେବ ବୋଲି କହିଥିଲା ତାନ୍ତ୍ରିକ । ଆଉ ଏହା ପରେ ମହିଳାଙ୍କୁ ରାୟଗଡ ଜିଲ୍ଲା ନିଆଯାଇ ସେଠାରେ ଖୋଲାରେ ଗାଧୋଇବାକୁ ବାଧ୍ୟ କରିଥିଲେ ଶାଶୁଘର ଲୋକ ।
ମହିଳା ଜଣଙ୍କ ଏନେଇ ଅଭିଯୋଗ କରିବା ପରେ ୪ ଜଣଙ୍କୁ ଗିରଫ କରିଛି ପୋଲିସ । ଯୌତୁକ ନିର୍ଯାତନା ସହ ପୁଅ ଜନ୍ମ କରି ନପାରିବାରୁ ଶାଶୁଘର ଲୋକେ ତାଙ୍କୁ ବିଭିନ୍ନ ଉପାୟରେ ୨୦୧୩ ମସିହାରୁ ଅତ୍ୟାଚାର କରି ଆସୁଥିଲେ । ତେବେ ପୂର୍ବରୁ ମଧ୍ୟ ତାଙ୍କୁ ଗୁଣି କରା ଯାଇଥିବା ମହିଳା ଅଭିଯୋଗ କରିଛନ୍ତି । ପୁନେର ଭାରତୀ ବିଦ୍ୟାପୀଠ ଥାନାରେ ମହିଳା ଜଣକ ଏଫ୍-ଆଇ-ଆର ଦେଇଛନ୍ତି । ଅଭିଯୋଗ ଅନୁଯାୟୀ, ତାନ୍ତ୍ରିକ କହିଥିଲେ କି ମହିଳା ଜଣକ ଯଦି କୌଣସି ଲୋକ ଚଳପ୍ରଚଳ କରୁଥିବା ଝରଣାରେ ସମ୍ପୂର୍ଣ୍ଣ ଉଲଗ୍ନ ହୋଇ ଗାଧୋଇବେ ତେବ ଯାଇ ତାର ପୁଅ ଜନ୍ମ ହେବ ।
ଏହାପରେ ତାନ୍ତ୍ରିକ ପୂଜାପାଠ କରିଥିଲେ ଏବଂ ପରେ ମହିଳାଙ୍କୁ ରାୟଗଡ଼ ଜିଲ୍ଲାରେ ଥିବା ଏକ ଝରଣାକୁ ନିଆ ଯାଇଥିଲା । ସେହିଠାରେ ତାଙ୍କୁ ଲୋକଙ୍କ ଆଗରେ ଉଲଗ୍ନ ହୋଇ ଗାଧୋଇବାକୁ ବାଧ୍ୟ କରା ଯାଇଥିଲା । ଅନ୍ୟପଟେ ପୋଲିସ୍ ଅଭିଯୋଗ ପାଇବା ପରେ ତଦନ୍ତ କରି ଜାଣି ପାରିଛି ଯେ ମହିଳାଙ୍କ ସ୍ୱାମୀ ନିଜ ସ୍ତ୍ରୀର ଜାଲ ଦସ୍ତଖତ କରି ବ୍ୟାଙ୍କରୁ ୭୫ ଲକ୍ଷ ଟଙ୍କାର ଲୋନ୍ ନେଇଛନ୍ତି । ଏସବୁକୁ ନେଇ ପୋଲିସ୍ ଅଧିକ ତଦନ୍ତ କରୁଛି ।
