Double Murder mystery: ଯେଉଁ ପଡୋଶୀ ଭରଷାରେ ଛାଡ଼ିଥିଲେ ମା ଏବଂ ଜେଜେମାଙ୍କୁ, ସେ ହିଁ କରିଦେଲା ଦୁହିଁଙ୍କ ହତ୍ୟା, ଏହିପରି ଖୋଲିଲା ରହସ୍ୟ

ଦିଲ୍ଲୀର ବେଲକମ୍ ଅଞ୍ଚଳରେ ରହୁଥିବା ଦୁଇ ଭାଇ ଯେତେବେଳେ ଚାରିଦିନ ଛୁଟି ମନାଇ ଅଗଷ୍ଟ 16 ତାରିଖ ସକାଳେ ଘରକୁ ଫେରିଲେ, ସେତେବେଳେ ଏହି ଦୁନିଆର ସବୁଠାରୁ ଭୟଙ୍କର ଦୃଶ୍ୟ ସେମାନଙ୍କୁ ଅପେକ୍ଷା କରିଥିଲା । ସେତେବେଳେ ଦୁଇ ଭାଇ ଘରକୁ ଆସି କଲ ବେଲ ବଜାଇଲେ ଏବଂ କବାଟ ଖଟ ଖଟ ମଧ୍ୟ କଲେ, କିନ୍ତୁ କେହି କବାଟ ଖୋଲିଲେ ନାହିଁ କିମ୍ବା ଭିତରୁ ମଧ୍ୟ କୌଣସି ଶବ୍ଦ ଶୁଣାଗଲା ନାହିଁ । ତେଣୁ ଦୁଇଭାଇ ଭାବିଲେ ଯେ ବୋଧହୁଏ ସେମାନଙ୍କ ମା ଏବଂ ଜେଜେମା ଗଭୀର ନିଦରେ ଶୋଇ ପଡିଛନ୍ତି ।

ଏହାପରେ ଦୁହେଁ ନିଜ ପାଖରେ ଥିବା ଘରର ଆଉ ଗୋଟିଏ ଚାବି ଦ୍ଵାରା ଲକ୍ ଖୋଲିଲେ ଏବଂ ଭିତରକୁ ଯାଇ ଯାହା ଦେଖିଲେ ତାହା ଅତ୍ୟନ୍ତ ଭୟଙ୍କର ଥିଲା । ସେମାନେ ସେହି ଭୟଙ୍କର ଦୃଶ୍ୟ ଦେଖି ଥରି ଉଠିଲେ । ସେମାନେ ଚିତ୍କାର କରି ଘରୁ ବାହାରକୁ ଚାଲିଆସିଲେ । ଘରେ ସେମାନଙ୍କ ମା ଏବଂ ଜେଜେମାଙ୍କର ହତ୍ୟା ହୋଇସାରିଥିଲା । ମାଙ୍କ ଲାସ୍ ଗ୍ରାଉଣ୍ଡ ଫ୍ଲୋରରେ ଥିବା ଗୋଟିଏ ବେଡ୍ ଉପରେ ପଡ଼ିଥିବାବେଳେ ଜେଜେମାଙ୍କ ଲାସ୍ ମଧ୍ୟ ତାଙ୍କ ବେଡ୍ ଉପରେ ପଡିଥିଲା । ଘରର ଜିନିଷପତ୍ର ଏଣେ ତେଣେ ପଡ଼ିଥିଲା, ଯେଉଁଥିରୁ ଦୁଇଭାଇଙ୍କୁ ଲାଗିଲା ଯେ ଚୋରି ଉଦ୍ଦେଶ୍ୟରେ ମା ଏବଂ ଜେଜେମାଙ୍କୁ ହତ୍ୟା କରାଯାଇଛି ।

ପୋଲିସ ପାଖରେ ଏହି ସୂଚନା ପହଞ୍ଚିବା ମାତ୍ରେ ପୋଲିସ ମଧ୍ୟ ଆଶ୍ଚର୍ଯ୍ୟ ହୋଇଗଲା ଏବଂ ପୋଲିସ ପାଇଁ ଏହା ଗୋଟିଏ ବଡ ଚ୍ୟାଲେଞ୍ଜ ଥିଲା । କାରଣ ଏହି ଦୁଇଭାଇ କାହା ଉପରେ ସନ୍ଦେହ ମଧ୍ୟ କରିନଥିଲେ । ଏପରି ପରିସ୍ଥିତିରେ ପୋଲିସ ପାଇଁ ଏହି ମାମଲାର ମୂଳ ପର୍ଯ୍ୟନ୍ତ ଯିବା ଗୋଟିଏ ଚ୍ୟାଲେଞ୍ଜ ପାଲଟିଗଲା ।

ପଡୋଶୀଙ୍କୁ ଦେଇଥିଲେ ଦେଖାଶୁଣା କରିବାର ଦାୟିତ୍ବ :-

ତେବେ ହଁ, ପଚରାଉଚରାରେ ଦୁଇଭାଇ ନିଜ ପଡୋଶୀ ହର୍ଶିତଙ୍କ ବିଷୟରେ କହିଥିଲେ ଏବଂ କହିଲେ ଯେ ହର୍ଶିତ ସେମାନଙ୍କର ପୁରୁଣା ସାଙ୍ଗ ଅଟେ । ତେଣୁ ଛୁଟି ମନାଇବା ପାଇଁ ଯିବା ପୂର୍ବରୁ ସେମାନେ ହର୍ଶିତଙ୍କୁ ଏହି ବିଷୟରେ କେବଳ କହିନଥିଲେ ବରଂ ସେମାନଙ୍କ ମା ଓ ଜେଜେମାଙ୍କ ଦେଖାଶୁଣା କରିବା ସହିତ ଚାଣ୍ଡନୀ ଛକରେ ଥିବା ସେମାନଙ୍କ ଦୋକାନର ଧ୍ୟାନ ରଖିବାକୁ ମଧ୍ୟ କହିଥିଲେ । ତେବେ ପୋଲିସ ଏହାପରେ ହର୍ଶିତଙ୍କୁ ପଚରାଉଚରା କରିବାକୁ ବାଧ୍ୟ ହୋଇଥିଲା ।

ଯେତେବେଳେ ହର୍ଶିତଙ୍କୁ ଏହି ବିଷୟରେ ପଚରାଗଲା, ସେତେବେଳେ ସେ ବହୁତ୍ ନିରୀହ ଭାବେ କହିଲା ଯେ ତାକୁ ତା ସାଙ୍ଗ ଘରେ ହୋଇଥିବା ଚୋରି କିମ୍ବା ସେମାନଙ୍କ ମା ଓ ଜେଜେମାଙ୍କ ହତ୍ୟା ବିଷୟରେ କିଛି ବି ଜଣା ନାହିଁ । କିନ୍ତୁ ସେ ଏହା ମଧ୍ୟ କହିଲା ଯେ ସେହି ଦୁଇଭାଇଙ୍କର କହିବା ଅନୁଯାୟୀ, ସେ ଦିନେ କି ଦୁଇଦିନ ତାଙ୍କ ଘରକୁ ଯାଇ ମା ଓ ଜେଜେମାଙ୍କୁ ଦେଖା କରି ଆସିଥିଲା, କିନ୍ତୁ ଏସବୁ କେବେ ହେଲା, କେମିତି ହେଲା, କିଏ କଲା ସେ ଏସବୁ ବିଷୟରେ କିଛି ଜାଣିନାହିଁ ।

ତାପରେ ପୋଲିସ ନିଜର ତଦନ୍ତ ଆରମ୍ଭ କରିଦେଲା ଏବଂ ସେ ସେହି ଦୁଇଭାଇଙ୍କୁ ପଚାରିଲା ଯେ ଏତେ ଦିନ ପର୍ଯ୍ୟନ୍ତ ତୁମେ ଘରାଲୋକଙ୍କ ସହ କଣ୍ ପାଇଁ ଯୋଗାଯୋଗ କରିନଥିଲ । ଏହା ଉପରେ ଦୁଇଭାଇ କହିଲେ ଯେ ଯେହେତୁ ଆମେ ହର୍ଶିତକୁ ଆମ ମା ଓ ଜେଜେମାଙ୍କ ଧ୍ୟାନ ରଖିବାକୁ କହିଥିଲୁ, ତେଣୁ ଆମେ ହର୍ଶିତକୁ ଫୋନ୍ କରି ହାଲ ଚାଲ୍ ପଚାରୁଥିଲୁ ଏବଂ ହର୍ଶିତ ସବୁ ଥର ମା ଓ ଜେଜେମା ଭଲ ଅଛନ୍ତି ବୋଲି କୁହେ । ତାପରେ ପୋଲିସ ଜାଣିପାରିଲା ଯେ ଏଥିରେ ହର୍ଶିତର ହିଁ ହାତ ରହିଛି, କାରଣ ଅଗଷ୍ଟ 13 ତାରିଖ ପରେ ମା ଓ ଜେଜେମା ବାହାରକୁ ମଧ୍ୟ ବାହାରି ନଥିଲେ କି ସେମାନଙ୍କର କୌଣସି ଖବର ନଥିଲା ।

ତାପରେ ପୋଲିସ ସିସିଟିଭି ଫୁଟେଜ ଚେକ କଲା ଏବଂ ସବୁକିଛି ଜଣା ପଡ଼ିଗଲା । ପ୍ରକୃତରେ ହର୍ଶିତ ହିଁ ସବୁ ଟଙ୍କା, ଗହଣା ଏବଂ ମୂଲ୍ୟବାନ ଜିନିଷ ଚୋରି କରିବା ଉଦ୍ଦେଶ୍ୟରେ ସେ ଦୁଇଭାଇଙ୍କର ମା ଓ ଜେଜେମାଙ୍କୁ ଅତି ନିର୍ଦ୍ଦୟ ଭାବେ ହତ୍ୟା କରିଥିଲା । ତେବେ ସତ ସାମ୍ନାକୁ ଆସିବାପରେ ଅଭିଯୁକ୍ତ ହର୍ଶିତ ମଧ୍ୟ ହତ୍ୟା କରିଥିବା କଥାକୁ ସ୍ବୀକାର କଲା ଏବଂ ପ୍ରମାଣ ସବୁ ବର୍ତ୍ତମାନ ଅଭିଯୁକ୍ତକୁ ଜେଲରେ ପହଞ୍ଚାଇ ଦେଇଛି ।