ଶିବସେନା ସରକାରଙ୍କ ପ୍ରତି ରାଜନୈତିକ ସଙ୍କଟ ଘନେଇବାରେ ଲାଗିଥିବା ବେଳେ ବର୍ତ୍ତମାନ ସୋସିଆଲ ମିଡିଆରେ ମଧ୍ୟ ଅଭିନେତ୍ରୀ କଙ୍ଗନା ରନୱତଙ୍କ ପୁରୁଣା କଥା ଉଙ୍କି ମାରୁଛି । ମହାରାଷ୍ଟ୍ର ଏମଏଲସି ନିର୍ବାଚନର ମତାମତ ଆସିବାପରେ ଶିବସେନାର ବିଦ୍ରୋହୀ ନେତା କିଛି ସମର୍ଥକ ବିଧାୟକଙ୍କୁ ଧରି ଉଦ୍ଧବ ସରକାରଙ୍କ ପ୍ରତି ଚ୍ୟାଲେଞ୍ଜ ସୃଷ୍ଟି କରିଛନ୍ତି । ଯାହାକୁ ନେଇ ମହାରାଷ୍ଟ୍ର ଠାରୁ ଦିଲ୍ଲୀ ପର୍ଯ୍ୟନ୍ତ ହଇଚଇ ସୃଷ୍ଟି ହେବାରେ ଲାଗିଛି । ସ୍ଥିତି ଏପରି ହୋଇଗଲାଣି ଯେ ଉଦ୍ଧବ ସରକାରଙ୍କ ଶାସନ ଗାଦି ମଧ୍ୟ ଟଳମଳ ହେଲାଣି ।
ଅନ୍ୟପଟରେ ସୋସିଆଲ ମିଡିଆରେ ଅଭିନେତ୍ରୀ କଙ୍ଗନା ରନୱତଙ୍କ ଭିଡିଓକୁ ନେଇ ଗୋଟିଏ ସମାନ୍ତରାଳ ଚର୍ଚ୍ଚା ଚାଲିଛି । 2020 ରେ କଙ୍ଗନା ଉଦ୍ଧବଙ୍କୁ ଇଙ୍ଗିତ କରି କହିଥିବା ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି । 2020 ରେ ଯେତେବେଳେ କଙ୍ଗନାଙ୍କ ଘର ଭଙ୍ଗା ଯାଇଥିଲା, ସେତେବେଳେ କଙ୍ଗନା କହିଥିଲେ ଯେ ” ଯିଏ ନାରୀଙ୍କୁ ଅସମ୍ମାନ କରିଛି, ତାର ଗର୍ବ କେବେ ବି ରହିନାହିଁ । ରାବଣ ପରି ଲୋକର ମଧ୍ୟ ଗର୍ବ ରହିନାହିଁ । ସେ ସୀତାଙ୍କୁ ଅପମାନ କରିଥିଲା, ତେଣୁ ତାର ପତନ ମଧ୍ୟ ହୋଇଥିଲା । ତେଣୁ ଯିଏ ନାରୀକୁ ଅପମାନ କରିବ, ତାର ପତନ ନିଶ୍ଚୟ । ଆଜି ମୋ ଘର ଭାଙ୍ଗିଛ, କାଲି ତୁମ ଗର୍ବ ଭାଙ୍ଗିଯିବ ଉଦ୍ଧବ ।”
କଙ୍ଗନାଙ୍କ ଏହି ପୁରୁଣା ଭିଡିଓ ଗୁଡ଼ିକ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି । କିଛି ୟୁଜର ଏହି ଭିଡିଓ ସେୟାର କରି ଲେଖିଛନ୍ତି ଯେ ” କର୍ମ ଉଚିତ୍ ଶିକ୍ଷା ଦେଇଛି” । ଆଉ କିଛି ଲେଖିଛନ୍ତି, ” ଯେମିତି କର୍ମ, ସେମିତି ଫଳ” ।
ସୂଚନାଯୋଗ୍ୟ ଯେ 2020 ରେ କଙ୍ଗନା ଏବଂ ସଞ୍ଜୟ ରାଉତଙ୍କ ଟୁଇଟକୁ ନେଇ ବିବାଦ ବଢିଥିଲା । ଏହାସହିତ କଙ୍ଗନା ମୁମ୍ବାଇ ପୋଲିସକୁ ମାଫିଆ ଏବଂ ମୁମ୍ବାଇକୁ ପାକିସ୍ତାନ ସହ ତୁଳନା କରି ହରଡଘଣାରେ ପଡ଼ିଥିଲେ । ବିଏମସି ପକ୍ଷରୁ ତାଙ୍କ ଅଫିସ ଇଲିଗାଲ ସ୍ଥାନରେ ହୋଇଛି ବୋଲି ଦର୍ଶାଯାଇ ଭଙ୍ଗା ଯାଇଥିଲା ।
ସେହି ସମୟରେ କଙ୍ଗନା କହିଥିଲେ ଯେ “ଉଦ୍ଧବ, ତୁମେ ଭାବୁଛ ତୁମେ ମୋ ଠାରୁ ପ୍ରତିଶୋଧ ନେଇଛ । କିନ୍ତୁ ଆଜି ମୋ ଘର ଭାଙ୍ଗିଛି, କାଲି ତୁମ ଗର୍ବ ଭାଙ୍ଗିଯିବ ।” ବୋଧହୁଏ କଙ୍ଗନାଙ୍କ ଏହି ଅଭିଶାପ ଉଦ୍ଧବଙ୍କ ଉପରେ ପଡ଼ିବାକୁ ଯାଉଛି । ବୋଧହୁଏ ଶିବସେନାର ସାମ୍ରାଜ୍ୟ ଭାଙ୍ଗିଯିବ । ଆଗାମୀ ଦିନରେ କଣ୍ ହେବ, ତାହା ଦେଖିବା ବାକି ରହିଲା ।